بسم الله الرحمن الرحيم
اليوم أكتب لكم وأن مبسوط بالحاقي ببرنامج خادم الحرمين الشريفين للابتعاث الخارجي بعد معاناة دامت 7 أشهر ، في الحقيقة ما زالت المعاناة مستمرة لأنني فقط بالأسم أصبحت مبتعثًا لكنني إلى الآن لم أستلم أية مكافئة ولم يفتح لي ملف حتى وكلما راجعتهم يقولون أنت توك ما صار لك اسبوع ملحق الملف يطول شوي ، يعني بالله عليكم حتى في بلد التطور والتكنلوجيا الروتين هو الروتين .
سبع شهر في استراليا ساكن مع واحد كوري عمره 25 ببيته انسان نفسية بس اللي مصبرني عليه اني ساكن معاه لحاله مافيه بنات ولا قلق مثل السكن مع عوايل قوانين وحوسه بالأكل وغيره ، ساكن في غرفة 3×3 أجارها الشهري 2200 ريال تخيلوا هذا أجار شقة كاملة في السعودية أو دور كامل ، أطبخ وأنفخ وأكل من طباخ يديني ، شاري لي سيكل كل يوم أدربيه للمعهد اللي يبعد كيلوين عن البيت .
الحين وبعد ما صرت والحمد لله بأشتري لي سيارة وأوسع على نفسي من فضل الله وبأنقل لسكن أوسع وأريح وهذا كله من فضل الله علي ثم من خير الملك أطال الله عمره بالصالحات والعافية ، والله لوما توفيق الله ثم برنامج الابتعاث مالقينا سعودي واحد يدرس بالخارج واللي الحين وصلوا على ما أعتقد 70 ألف طالب مبتعث .
اليوم الأحد وبكره الاثنين أول أيام الأسبوع عندنا بأصبح على المعهد الجديد بعد ما خلصت من معهدي السابق وبأصبح على الملحقية بأحرقهم تلفونات لين ما يخلصون أموري دعواتكم لي .
أشوفكم في تدوينه ثانية مع أول يوم مكافئة إن شاء الله .
تحياتي ،،،