بسم الله الرحمن الرحيم
السلام عليكم ورحمة الله وبركاته
صفنة عن الحال اللي أنا فيها الحين وعن فرق العادات والتقاليد بين استراليا والسعودية بالتحديد وعن الفرق بيننا وبين الدول اللي يسمونها متقدمة وهي متأخرة بالأصح ومقياسنا يختلف عن مقياسهم حنا ناس مسلمين مصلين ومسمين مقياسنا كتاب الله وسنة نبيه عليه الصلاة والسلام وهذولي مقياسهم وضعي من صنع البشر والفرق بين المقياسين واضح لمن كان له قلب أو ألقى السمع وهو شهيد .
يمكن تقولون لي شتحجي انت شتقول شوف هم وين وصلوا بالعلم وشوف شوارعهم وتعاملهم وشوف حنا شلون حالنا ، انا معاكم انهم متقدمين علينا بالتكنلوجيا بس لكن تعالوا نشوف الفروقات اللي باعرضها لكم وانتوا قولوا لي بنهاية هالصفنة منو المتقدم على الثاني بالفعل ويكفي ان قلت حنا مسلمين وهم كفار ، أفمن كان مؤمنا كمن كان فاسقاً ، لايستوون !!! .
) أفمن كان مؤمنا كمن كان فاسقا لا يستوون )18( أما الذين آمنوا وعملوا الصالحات فلهم جنات المأوى نزلا بما كانوا يعملون )19( وأما الذين فسقوا فمأواهم النار كلما أرادوا أن يخرجوا منها أعيدوا فيها وقيل لهم ذوقوا عذاب النار الذي كنتم به تكذبون )20( ولنذيقنهم من العذاب الأدنى دون العذاب الأكبر لعلهم يرجعون )21( ومن أظلم ممن ذكر بآيات ربه ثم أعرض عنها إنا من المجرمين منتقمون )22) )
أنا سبق وكتبت في مدونتي بعنوان : الحياء شعبة من الإيمان ، وكنت اكتب عن المشاهد الي اشوفها هنيه واقارنها باللي عندنا واشوف العجب العجاب واحمد الله سبحانه اللي كرمنا بالاسلام ، الاسبوع اللي فات كنت واقف انتظر الباص الصبح الساعه 8 وكان فيه بالموقف بنتين وحرمة وزوجها الشاهد هالبنتين كانوا لاصقات ببعض حظن بحظن ويتهامسون شوي وتبدأ القبلات أعزكم الله على مرئى ومسمع من الناس في مكان عام وﻻ همهم اي احد حولهملا كبير ولا صغير يعني وقت خروج اطفال لمدارسهم ويشوفون هالمنظر عادي لا مبالاة ، والاغرب والأعجب من هذا كله مستحيل احد يكلمهم أو يتجهم وجهة لهالمناظر البهيمية أو حتى أضعف الإيمان ينكر عليهم ، بربكم هذا تقدم ولا تأخر؟ .
ممكن نقول هالتصرفات فردية والناس تنكرها ولا تقرها ، لكن اسمعوا هالسالفة ، مدرستنا ام الخمسين سنة تسولف لنا عن اولادها اثنين واحد عمره 19 والثاني 9 وتقولنا ابو 19 هذا قعد له بالبيت شهر ما يطلع ولا يروح ولا يرد بسبة بنت جرحت قلبه وتركته والولد مصدوم وحنا نحاول فيه يطلع من هالحال ويشوف له صديقة ثانية girl friend على ما يسمونها بس الولد مايبي يرتبط ببنات بعد هالسالفة ابد والحين هو أعزب single أو مفرد بالتعبير الحرفي واللي حنا نطلقه على الرجل اللي مو متزوج هم يطلقونه على اللي ماعنده صديقة ، بربكم هذا تقدم ولا تأخر؟ .
المواقف والمقارنات كثيرة لا حصر لها لان بكل بساطة كل ما ترى عين العاقل هنا يراها تأخرًا واضحًا جليًا .
طبعا داخل الفصل الدراسي اختلاط بنات واولاد ومدرسة ، واحيان تدور نقاشات ومواضيع او مجرد أسألة أنا كرجل مسلم أتحرج من اني اسمعها شلون لو اناقشها وشلون لو انا اطرحها وشلون لو اختي او بنتي باحد هالديار تدرس لحالها بهذا الفصل وتسمع هالنقاشات اللي يندى لها الجبين ، طبعا سالفة بوي فريند وقيرل فريند هذي سوالف عادية مثل سوالف الاكل والشرب والطلعات محد يستحي منها او ياخذ منها موقف ابدا وعادي المدرسة تسولف عن صديقها بالاجازة سافروا او المدرس يسولف وين راح مع صديقته المنفصل عنها ، الاسبوع اللي فات سأل طالب المدرسة قاله الشواذ جنسيا شنو اسمهم بالانجلش قالت له كذا قالها والبنات قالت كذا والاسم الفلاني ينقال للصنفين واسترسلت بالنقاش بدون اي حرج الين وصلت ان قالت ان وحده من صديقاتها شاذة … إلخ ، بربكم هذا تقدم ولا تأخر؟ .
وحده من الكلمات اللي درسناها هي chicks وتعني الصوص او الكتاكيت قال طالب للمدرسة هذي نفس الكلمة للي تنقال للبنات في الملهى الليلي قال ايه هذا من باب التشبيه ، المهم بعد كم يوم انا دخلت الفصل متأخر خمس دقايق وانا داخل رايح للكرسي قال واحد من الطلاب عبدالله كان يدور chicks وضحكوا الطلاب والمدرسة والحمد لله تداركت الموقف وقلت لا تقصد ادور chips يعني بطاطس بحكم اني راجع من الغدا فأعجبت المدرسة بردي وشلون ما وافقته على مزحته السامجة وبلعتها وسكت وقالت انت ذكي ومن هالكلام ، شوفوا شلون هالانحطاط والوضاعة اللي فيهم وما يعرفون احترام مدرس او شي ولا عندهم لكل مقام مقال ، بربكم هذا تطور ولا تأخر؟ .
ولو تكلمنا من ناحية الستر واللبس فهذا فيه العجب العجاب ،أنا وأنتم تعرفون أن عورة الرجل من السرة للركبة والمرأة كلها عورة الا ما ظهر من كفيها وساقيها ورأسها عند محارمها وما في ذلك من استثناءات عند بعض أهل العلم من المذاهب المختلفة ، الشاهد هنا ان الحال مقلوب وجهًا على عقب ، يعني صار البنات والحريم بالشوارع والاماكن العامة يلبسون القصير جدًا جدًا ولما اقول جدًا أعني شبرين فقط لا غير لدرجة ان الواحد ما يدري وين يودي وجهة من هالنساء الكاسيات العاريات وبالمقابل ترى الرجال ببناطيلهم الطويلة الجينز الواسعة والاكمام الطويلة ولا يظهر منه الا رأسه وكفيه شوفوا شلون انقلبت الموازين عندهم ، بربكم هذا تقدم ولا تأخر؟ .
والغريب ان بعض الشباب السعوديين منبهرين بالمجتمع هذا لدرجة ان قبل فترة واحد من الشباب واقفين انا معاه بزاوية شارع ونسولف ويقولي انه بيروح اجازة السعودية بعد اسبوع ، شوي ويشوف الشارع ويقول الحياة هنا حياة كريمة طالعته بنظرة تعجب قلت له طيب اقعد بهالديرة وانا بروح بدالك السعودية اجازة ضحك وسكت ما رد ، وغيره كثير من رواد البارات والملاهي الي ينسلخون من كل قيمهم وعقائدهم في سبيل تلبية نداء الشيطان اللي يقول لاهل النار يوم القيامة : ) وما كان لي عليكم من سلطان الا ان دعوتكم فاستجبتم لي ( يعني ماكو شيطان يسحبك من يديكم ويدخلك البار غصب ، الا يوسوس لك ويدعوك وانت تقرر تروح ولا لا !! .
وان جيتوا لنظام العيشة والعادات والتقاليد تنبهرون وبالفعل تحسون بالنعمة اللي الله منعمها علينا ، حنا نقول غلاء فاحش عندنا والواحد ماهو قادر يعيش بكرامة والدنيا فقر ، تعالوا شوفوا هنيه شلون عايشين تعالوا شوفوا بيوتهم واسعارهم وحياتهم ، انا مجرد ما اقولهم انا واخواني سبعة يصكهم راسهم هم حدهم ثلاثة اربعة فوق هذا واااجد بعدين ماعندهم ابوك يشتري لك سيارة الا اذا كنتوا من بقة الاغنياء وصرت الولد المدلل عند اهلك ، انا لما اقولهم ان بيتنا دورين فيه خمس غرف نوم واربع حمامات ومجلس ومقلط وصالة يشهقون يقولون انت غني هم حدهم غرفتين او ثلاث نوم وصالة ومطبخ وحمام ولا حمامين والغالب دور واحد واذا صار دورين فوق يكون مافيه الا غرفتين نوم وحمام طبعا هذا ينشرى بالملايين ، واذا قلت لهم ان ابوي شرالي سيارة يوم تخرجت من الثانوية ، صكهم راسهم قالوا انت ابوك غني حيل ، واذا قلت لهم عندنا سواق وشارين سيارة له يقضي مشاويرنا هنيه يسالون يقولون كل السعوديين جذيه ولا بس انتوا ؟!! ، ومن اجيب لهم طاري ان البنزين عندنا 45 هللة و 60 هللة تطلع عيونهم ويسبون بديرتهم هم عندهم البنزين بدولار ونص يعني اللتر الواحد 5 ريال يعني فل سيارة 80 لتر عندهم 400 ريال وحنا الفل عندنا لنفس الكمية 45 ريال ، أدري ما راح تصدقون اول ما تسمعون لان هم بعد ما صدقوا اول ما سمعوا هالكلام ، شوفوا شلون العيشة اللي حنا عايشينها ، يكفيكم ان الطالب المبتعث في استراليا يستلم راتب 10000 ريال غير رسوم الدراسة ويعادل اكثر من رواتب الموظفين هنيه ما بالكم بحول 200000 طالب مبتعث تدفع لهم الحكومة مصاريف كاملة واذا رجعوا السعودية مو مطلوب منهم يدفعون ريال واحد للحكومة لا ويشتغل بشهادته براتب 10 الاف اذا مهندس وكله بجيبة لا ضرايب ولا شي هنيه الواحد الراتب عليه ضرايب اي شي ينشرى وينباع عليه ضرايب حنا الحمد لله في السعودية ﻻ ضرايب ولا شي وكل شي متوفر لنا ولحد يقولك عطنا شي من فلوسك ، حتى الزكاة اللي هي ركن من اركان الاسلام ما تدفعها الا اذا كانت عندك فلوس تسمح لك انك تزكي وان زكيت ما تعطيها للحكومة تعطيها للفقير ، يالله لا تغير علينا .
أنا أحس اني كثرت كلام بهالصفنة تقريبا 1200 كلمة ، أتمنى ما ازعجتكم وانا قاعد افكر بصوت مسموع .
تحياتي ،،