اليوم أكتب لكم وأن مبسوط بالحاقي ببرنامج خادم الحرمين الشريفين للابتعاث الخارجي بعد معاناة دامت 7 أشهر ، في الحقيقة ما زالت المعاناة مستمرة لأنني فقط بالأسم أصبحت مبتعثًا لكنني إلى الآن لم أستلم أية مكافئة ولم يفتح لي ملف حتى وكلما راجعتهم يقولون أنت توك ما صار لك اسبوع ملحق الملف يطول شوي ، يعني بالله عليكم حتى في بلد التطور والتكنلوجيا الروتين هو الروتين .

سبع شهر في استراليا ساكن مع واحد كوري عمره 25 ببيته انسان نفسية بس اللي مصبرني عليه اني ساكن معاه لحاله مافيه بنات ولا قلق مثل السكن مع عوايل قوانين وحوسه بالأكل وغيره ، ساكن في غرفة 3×3 أجارها الشهري 2200 ريال تخيلوا هذا أجار شقة كاملة في السعودية أو دور كامل ، أطبخ وأنفخ  وأكل من طباخ يديني ، شاري لي سيكل كل يوم أدربيه للمعهد اللي يبعد كيلوين عن البيت .

الحين وبعد ما صرت والحمد لله بأشتري لي سيارة وأوسع على نفسي من فضل الله وبأنقل لسكن أوسع وأريح وهذا كله من فضل الله علي ثم من خير الملك أطال الله عمره بالصالحات والعافية ، والله لوما توفيق الله ثم برنامج الابتعاث مالقينا سعودي واحد يدرس بالخارج واللي الحين وصلوا على ما أعتقد 70 ألف طالب مبتعث .

اليوم الأحد وبكره الاثنين أول أيام الأسبوع عندنا بأصبح على المعهد الجديد بعد ما خلصت من معهدي السابق وبأصبح على الملحقية بأحرقهم تلفونات لين ما يخلصون أموري دعواتكم لي .

أشوفكم في تدوينه ثانية مع أول يوم مكافئة إن شاء الله .

تحياتي ،،،

السلام عليكم ورحمة الله وبركاته

اليوم طرالي أكتب بالعامية وبالخصوص بلهجتي الزبيرية اللتي لطالما تغنيت بها ، ما يهمني صراحة ان يكون الكلام منمق ومعسول ولا تهمني في هذه الصفنات الفصاحة لان صراحة ودي أكتب ما يجري على لساني بشكل مباشر وانتوا تدرون ان الواحد اذا هم في الكتابة يختار الكلمات الفصيحة ويستحظر كل ما أوتي من بيان ليقيم كتابته وهذا بلاشك يأخذ حيز في فراغ الفكر والموقف المراد الكتابة عنه .

اليوم بديت هالسلسلة وسميتها صفنات ) تفكر وتدبر لغير الناطقين بالزبيرية ( ، وهي كما أسلفت باللهجة الزبيرية لكي يسهل علي أن أكتب ما يجري في رأسي بلا تصرف ولكي يكون اسهل للمتلقي ، لكنني سأحاول قدر المستطاع أن يكون كلامي مفهومًا للعموم بإذن الله .

صفنات اصفنها على طول وشلون ما اصفن وانا غريب بهالديرة لا اهل لا ربع ماغير هالأوزيين مثل ما يحبون يسممون نفسهم في استراليا ، البارحة سويت لي جاي وقعدت على الدجة عند الباب معاي مطارتي وبيالتي اللي دازينهم اهلي لي واتفكر عن عيشتي بهالديرة وشلون وصلت هنيتن والاحداث اللي صارت لي ، ولهت على اهلي على اميمتي وابيي ، ولهت على اخيتي راعية رياض وعلى سوالف عيلانها لجينة وحميدان ، ولهت على أخيتي اللي بالكويت وعلى سوالف عليوي ولدها ، ولهت على اخيتي اللي بالدمام الحامل وعلى سوالفها ونفسها الطيبة ، ولهت على اخيتي راعية المقالب والحركات والمفاجئات ، ولهت على اخيي الحرفة وعلى حوسته بالبيت  ، ولهت على اخيي آخر العنقود دبيبة وسوالفه مع امي ولفه ودورانه .

الله يذكر ذيك الأيام بحديقتنا انا وامي وابيي عند هالجاي المخدر وابوي يحورف بحطيباته وثعورة الدخنة طالعة من بيتنا ، جني اشوفها اميمتي بسيادتها بالحديقة وثوب الصلاة الأخضر اللي وارثته من يدتي تصلي شفعها ووترها ، وابيي رايح راد على هالمنقلة ويدندن ” صويحبي بالمحرقة يومي بيمينه – يلقط الخشبان وعينه عالقواطي ” .

أذكر ذيج الأيام وحنا بالحديقة وامي تقولي ” ياعبيد منهي اللي تستاهلك ، أنا بأفصفص البنات تفصفص لك بأشوف لك وحده سنعة تستاهلك ” ، أذكر أبيي وسوالفه لي يعلمني على عايلتنا وفلان شيصير لنا وشصار ما صار بأمور العايلة اللي شايل همها . أذكر ذيج الحديقة وذيج الخيمة وذاك الثيل وامي تسولف على ابوي وتقوله نبي نحط ورد منيه ونزرع مدري شنو مناك ، ” شفت ورد ابو يوسف الله يرحمه اللي وهقتنا فيه من ياعيله ما ورّد” وردت بعدها بجم شهر تسولف لي تقولي “ورد ابو يوسف ابشرك طش طشة وحده وصار شحلوة ” .

راحت ذيج الأيام اللي يردها وأرد للسعودية معزز مكرم ، هنيه ساكن لي بغريفة صغيرة أجارها اغلى من أجار دور كامل بالدمام ” ثلاثة في ثلاثة ” جنها محكر حمام ، أتذكر يدي الله يرحمه اذا جا من الزبير ايام ما كان خالي ساكن بشقة بدور ثاني ، يقول ” جني عصفور معلق بقفص ” على الشقة ، أنا جذيه هنيه جني عصفور ومقصقصه جنحاني بعد لو عندي ينحان جان طرت لأهلي ، وأذكره الله يرحمه يسمي سعودية ” ديرة ما يسلمون ” والله هنيه ديرة مو بس ما يسلمون ، الا لا يصلون ولا يصومون كلشي ماكو .

الله أكبر يا صوت الحق ، الله أكبر يا أذان المذن ، الله أكبر يا أذان توفيق الطحيني بالخفجي بالرمضانية على السفرة ننتظر الاذان وابوي يقول طول علينا توفيق اليوم ، الله أكبر يا أذان الشايب بالدمام اللي يفززك من النوم الفير بس مو متضايق الا مرتاح ، تتخيلون شلون واحد متعود يسمع الأذان يوميا من يوم ولد 25 سنة ويوميا حي على الصلاة وحي على الفلاح ، وفجأة ينقطع ولا يسمع لا أذان لا ذكر لاشي إلا أتعنى له تعني يوم الجمعة ، يسألني واحد يقولي أذن عندكم قلت له والله حنا ما يأذن عندنا نتحرى وقت الصلاة تحري وعلى التقويم ونكبر ونصلي .

الله أكبر يا ديرة العز وربي السعودية عز بس اغلب السعوديين مو حاسيين بالنعمة الي هم فيها مو حاسين بالعزة اللي هم فيها ، يالله تديم النعمة على المسلمين يااااارب ، أيل تصدقون أمس القريب وانا راد البيت أكو زراعه ثيل وشجر على الرصيف المهم أكو عمال توهم واصلين يحشون الثيل ويقلمون الشير ، ولا ذيج الحرما الشقرا لابسه لبس العمال والبوت اللي شطولة وتسحب بهندل المكينة بأقوى ما عندها مرة ومرتين وثلاث تبي تشغله عشان تقلم الشير ، أطالعها وأقول وين حريمنا ووين حريمهم ، ومرة شفت الصبح الساعه 8 حرمه واقفة عند عمارة تبني مع العمال عند خلاط الاسمنت قصايبها شطولهن ولابسة ذاك الأفرول ، صفنت عليها أقول وين حريمنا اللي قاعدات ببيوتهن معززات ومكرمات دوران بهالسوقة ولا تشيل هم الفلس شلون يوصلها صحيح اكو حريم وايد يتعبن ويشقن بس الاغلب اللي لا تشيل هم لا شغل ولا شي الريل هو اللي يتحمل نفقه واجار بيت ومصاريف العيلان والسيارة واذا اكو سواق بعد والشغالة ولا مطلوب من الحرمة أدني شي وﻻ وان اشتغلت الحرم مو مطلوب منها انها تصرف على البيت بل يجب على الزوج النفقه ولو كانت الزوجة غنية، وين هاللي ينادون حقوق المرأة عندنا يبونها تصير جذيه يبونها تكد وتكرف عشان لقمة عيشها ، الله المستعان .

شقول شحجي شخلي أنا لو ضليت أحجي ما أسكت بس كافي هنيه بأقوم أصلي المغرب الظاهر دش الوقت واشوفكم بصفنات ثانية .

تحياتي ،،،

أبو نجم

الحمد لله على نعمة الإسلام ، فكل يوم وأنت تتنقل في شوارع بيرث – إحدى المدن استرالية – توقن كم هو منحطٌ رقيهم وكم هو متأخرٌ تقدمهم وكم هو عاريٌ حيائهم ، كم وكم وكم هو نعمةُ ورحمةُ ورقيُ إسلامنا ، قال الله عز وجل : (( كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ وَلَوْ آمَنَ أَهْلُ الْكِتَابِ لَكَانَ خَيْرًا لَّهُم مِّنْهُمُ الْمُؤْمِنُونَ وَأَكْثَرُهُمُ الْفَاسِقُونَ )) (110) ال عمران .

ليت السفور اقتصر على كشف الوجه والرأس ، وليت الرداء اقتصر على كشف الارجل واليدين فيوميًا أصادف من لا تتحرج أن تلبس – للذهاب إلى معهد اللغة الإنجليزية الذي أقصده كل يوم – شبرين اثنين فقط ومنفصلين أيضًا ، شبر أو أقل يستر عورتها السفلى وشبر أو أكثر يستر معلق على أكتافها فقط ليتدلا على جسمها ، هذا طبعًا بمفهوم العورة عندهم ، فصدق المصطفى عندما أخبرنا أن الحياء شعبة من الإيمان .

والغريب أن رجالهم أشد حرصًا واحتشامًا من نسائهم ، ترى الرجل ولايكاد أن يظهر من جسمه إلى كفيه ورأسه وترى المرأة وهي تمشي عاريةً متبخترةً بتحررها ، وكأن الأصل في المرأة التعري والأصل في الرجل الستر . فسبحان من أرداهم لأسفل سافلين ويحظرني هنا خواتم سورة الكهف فيقول الله عز وجل (( قل هل ننبئكم بالأخسرين أعمالاً * الذين ضلَّ سعيهم في الحياة الدنيا وهم يحسبون أنَّهم يحسنون صنعاً )) .

أتحسبون الله مهملهم ؟؟

لا والله فقد شهدت المدينة التي أقطن فيها إعصارًا مروعًا ما أتى على شيء إلا وقد أثر به ، فخلال ساعة من نهار فقط أتى هذا الأعصار وهو جند من جند العظيم عز وجل محملاً بعذاب دمر كل ما مر عليه فقد كانت درجة الحرارة 30ْ مؤوية عندنا تساقطت حبات البرد بحجم كرات القولف ، ولكم أن تتخيلوا حبات برد بحجم كرات القولف تسقط من السماء على السيارات والبيوت والمباني والمزارع؟ فما هي فاعلة بهم ؟ ، لقد بلغت خسائرهم في تلك الساعة 300000000 دولار نعم هذا الرقم صحيح كما تراه ثلاث مائة مليون دولار استرالي قيمة الخسائر خلال ساعة أو ساعتين فقط .

اللهم احفظ بلادنا وبلاد المسلمين من كل خطب عظيم وأجعلها آمنة مطمئنة يأتيها رزقها رغدًا من كل مكان شاكرةً لأنعمك عليها .

تحياتي ،،،

عبدالله

هذه تدوينتي الأولى بعد التجديد في الموقع

وقررت أن أبدأها من جديد وأمسح كل ما كتبته سابقًا عل وعسى أن يوفقني الله فيها

اليوم الأحد السابع من ربيعٍ الأول للعام الواحد والثلاثين واربع مائة وألف لهجرة المصطفى صلى الله عليه وسلم، الموافق للعام العاشر وألفين لميلاد المسيح عليه السلام أفتتح مدونتي المتواضعة وأعرض فيها كل ما يخطر على بالي من حياتي  مقسمة على مراحل، ويرافق ذلك جوانب من ما يستفاد منه مما نجده على الشبكه العنكبوتية أو نصادفه في حياتنا اليومية أو علما تعلمته أعلمه من يود تعلمه .

كذلك أفتح الباب لكتاباتكم وملاحظاتكم وتعليقاتكم وانتقاداتكم مما يعلمني ما جهلت او يؤكد ما كتبت ، هذا وأصلي وأسلم على المبعوث رحمة للعالمين نبينا محمد عليه أفضل الصلاة وأتم التسليم .